I pili e sutt'e vrazze
Hannu raggiane i previti
ca mu è nu munnu bruttu,
ppecchì? ca mu se fimmine
vonnu mustrare tuttu!
E gamme ud'abbastavanu,
e cosce ed iu ve dicu,
c'un passa tempu e mustranu
c'un sutta du villicu!
Embece tempu primu
iu sempre me ricordu,
c'un se facianu
vide mancu nu pede lordu...
Però si nun vulennu
na gamma l'avìa vistu,
l'anima ce lassava
e ncuraggiava a Cristu,
ppe nun tè fa cadìre
nterra longu e tunnu
sbenutu e menzu mortu
du giramentu e munnu...
E bì ca tempu primu
avìanu n'atru stare:
a fìmmina era fimmina
e la sapìadi fare...
Nnò mù ccu s'atra moda
chi tutte vannu pazze
ppe se fa vide i pili
chi tenò sutt'e vrazze...
e vidi ppe le vie,
su granne o piccirille,
se giranu e se votanu
ed azanu e titille...
Pue vidi chilla lana
nzitusa e arriciatizza
chi para c'allu focu
diciadi attizza attizza...
Ed iu quannu le viu
me vena nu chiuritu
chi vorra ppe nu pocu
mu fossi lu maritu!
Madonna mia, tu sarvame,
nun me fa jì a lu nfernu
si ntra su core tegnu
na cosa cu nu pernu,
chi nun me duna pace,
nun me fa piglia sonnu,
vidennu certe cose
chi fare nun se ponnu!
Madonna mia, perduname,
ma diciaccellu tuni
a chisse chi tè preganu,
ppe amure e si guagliuni,
ch'e gamme s'ammucciassinu
e cosce e li prisutti,
sinnò si guagliunastri
nue li perdimu tutti...
Già sunnu nturduniti
para ca su stunati
a vucca aperta tenanu
e l'occhi ammasunati...
E tu, Segnure miu,
fall'ammuccià si pili,
sinnò tu perdi l'anime
e nue jettamu a bili !
